Mokabat sa P435 mil cash ang nakuha sa upat ka mga batan-ong tulisan sa dihang atol sa pagkanaog sa usa ka negosyanteng asawa sa usa ka barangay kapitan sa Daanbantayan diha sa dalan Logarta St. barangay Subangdako dakbayan sa Mandaue sa milabay’ng hapon.
Ang biktima mao si Merly Moreno, 46, kasamtangang nagpuyo sa San Jose Village, barangay Umapad dakbayan sa Mandaue, kapikas ni barangay Carnasa kapitan Joe Moreno.
Sa imbestigasyon ni Insp. George Aniñon ang deputy chief sa kapolisan sa station 2 sa MCPO nasayran nga mga 4:30 sa milabay’ng hapon sumala pa sa biktima namasin ang biktima nga mangatang og V-Hire diha sa maong dapit maong nikanaog kini sa taxi.
Apan sa pagkanaog ni Moreno pipila ka gutlo upat ka mga batan-on ang miduol kaniya ug mipakita sa ice pick nga gigunitan dungan sa pagdeklarar og tulis.
Gumikan sa kahadlok ni Moreno napugos siya sa paghatag sa iyang shoulder bag sa mga tulisan kinsa dali usab kaayong mipahilayo sa maong dapit.
Si Moreno daling nidangop sa kapolisan sa station 2 apan sa ilang pagresponde wala na diha ang mga tulisan.
Matod pang Aniñon duna na silay gidudahang tawo nga responsable sa maong pagpanulis ug gani sa pagsuwat ning balita nahibaw-an na nila kung asa miadto ang usa sa upat nga tulisan ug karon ilaha nang gipangita.