Council mituon sa usbaw sa Veco
Nangayo og kinse ka adlaw ang konseho sa dakbayan sa Sugbu ngadto sa Energy Regulatory Commission (ERC) una pa mopagawas og komento labot sa gipangayong recovery cost sa Visayan Electric Company (VECO).
Partikular nga gipangayo sa VECO mao ang recovery cost sa Sub-transmission Assets nga napalit gikan sa National Transmission Commission (NTC) ingon man ang provisional authority sa pagkolekta niini.
Mangayo ang VECO og P0.0218 matag kilowatt hour ngadto sa mga konsumidor sulod sa 4.90 ka tuig pagbawi sa ilang purchase costs, operations ug maintenance costs, working capital requirement sa Banilad-Mandaue Segment 69kV Line ingon man sa Banilad-Cotcot (Busay-Malubog) Segment 69kV Line ug sa mga ekipo ug accessories sa Banilad Sub-Station.
Gitinguha sa VECO nga sila kahatagan na og provisional authority aron mapatuman gilayon ang pagkolekta sa maong balayranan.
Gitun-an pa hinoon sa Committee on Energy sa konseho ang aplikasyon sa VECO kung unsa ang implikasyon niini apan una nang gisaway sa pipila ka konsehal ang VECO tungod kay dali ra kaayo silang mopasa sa ilang gasto ug bayranan ngadto sa mga konsumidor.
Ang mga opisyal sa VECO mipasabot sa ilang pagkolekta sa systems loss, universal charge ug sa uban pa niining gikolekta ngadto sa mga konsumidor.
Alang kanila legal ang pagkolekta sa nahisgutang mga balayranan tungod kay kini giingong gitugot sa hingtungdang ahensya.
- Latest
- Trending
