Nipasalig ang coordinator sa Salam Police Center ug deputy chief karon sa Police Community Relations (PCR) sa Police Regional Office-7 nga si Supt. Abdalun Awilun, usa ka Muslim, nga di motisok og kagubot ang mga Muslim nga anhi na namuyo.
Matud pang Awilun malinawon ang tanang Muslim dinhi sa Sugbu tungod sa ilang mga negosyo ug mga anak nga anhi na nagtungha kumparar sa mga Muslim karon nga namuyo sa Autonomous Region in Muslim Mindanao (ARMM).
Gihulagway niyang naglisod ug nahimong miserable ang kinabuhi karon sa mga dapit nga gihasi sa Moro Islamic Liberation Front (MILF).
Matud pang Awilun kumparar sa suporta sa mga lokal nga kagamhanan dinhi ngadto sa ilang mga konstituwente layo ra kaayo sa nahatag sa mga LGUs didto.
Usa sa gihimong sanglitanan ni Awilun mao ang paghatag og basic services nga wala kaayo maatiman didto ug ang pagtagad ni Mayor Tomas Osmeña sa Muslim communities dinhi.
Dunay gihimong dialogue kagahapon sa buhatan sa Office of the Muslim Affairs nga gipatawag sa pangulo niini nga si Haijan Sakiran nga gitambungan sa AFP ug PNP uban sa 40 ka local leaders sa Muslim communities dinhi sa Metro Cebu.