Gangs migara, 1 patay

Subling migara ang mga gangs dinhi sa Metro Cebu diin usa ka batan-on ang ilang gipatay ug sa laing insidente usa ka miyembro usab sa gang ang naangol tungod sa panagbangi sa kapikas nga gang.

Patay diha-diha ang usa ka 18-anyos nga lalaki human kini pusila sa usa ka giingong sakop sa gang kagahapon sa kaadlawon diha sa barangay Cansojong, dakbayan sa Talisay.

Ang biktima giila sa mga polis nga si Heceine Kith Bayking taga barangay Cogon-Pardo dakbayan sa Sugbu human makaangkon og usa ka samad pinusilan sa luyong bahin sa ulo ug duha sa buko-buko nga gituohang hinungdan sa iyang kamatayon.

Ang suspetsado nailhan lang sa ngalan nga “Bantol” kinsa dunay kuyog nga duha ka wala mailhing mga lalaki ug gidudahang sakop sa gang padayon pang gipangita sa kapolisan.

Si Bayking uban sa walo niini ka mga higala gikan nag-night swimming diha sa usa ka resort sa barangay Poblacion dakbayan sa Talisay ug nanglakaw padulong sa Cansojong.

Nasugatan nila ang grupo ni Bantol apan ang naulahi gikatahong miali kanila ug nangatuna kung unsang grupo sila masakop, si Bayking mitubag nga wala silay grupo apan diha-diha gihapsan siya og bato sa usa diha sa ulo.

Human maigo si Bayking kalit nga gipusil ni Bantol ang ulo niini ug giusban sa buko-buko hinungdan sa hinanaling kamatayon sa biktima, nagkatibulaag ang mga kaubanan ni Bayking pagkakita sa hitabo.

Sa laing hitabo, usa ka Darrel Lacay, 20, taga sitio Beavers barangay Day-as nga giingong sakop sa gang ang kritikal ang kahimtang human pusila sa ulo sa gidudahang miyembro sa kaatbang nga gang kagahapon sa kaadlawon.

Giila ang suspek mao si Harold Ribas alyas Bugis, taga F. Villa St. barangay T.Padilla ug Loreto Bitos Jr. alyas Aydong ug pito ka mga batan-ong kaubang lalaki.

Matud pang CCPO director Sr. Supt. Patrocinio Comendador, si Bitos sa ilang nakuhang impormasyon usa sa mga hitman sa ilang pundok.

Ang biktima migawas sa ilang balay aron unta pagpalit og pan diha sa dalan T. Padilla barangay Day-as uban sa tulo ka menor dihang kalit nga mibutho ang mga suspek ug dayong pusil kaniya.

Dali usab nga miikyas ang mga suspek samtang gidala sa tambalanan ang  biktima, nasayran usab nga atol sa pagpamusil naigo kaupat ang luyong bahin sa usa ka taxi nga diha sa daplin sa dalan.

Hasta ang mirespondeng mga tanod gipamusil usab apan wala makaigo hinungdan nga nakaikyas ang mga gangmen. (Uban sa report  ni Guam Logroño)