PO1 Agcol ipataktak pagkapolis – Napolcom

Dili kontento ang National Police Commission sa desisyon sa hepe sa Cebu Police Provincial Office (CPPO) Sr. Supt. Carmelo Valmoria nga igo lang miparelibo kang PO1 Dave Agcol sa Aloguinsan Police Station human mapamatud-ing positibo sa paggamit og gidiling drugas.

Si Napolcom regional director Bernardo Calibo mibutyag sa Banat News nga iyahang giduso ang dismissal proceedings batok ni PO1 Agcol tungod kay walay luna sa PNP kadtong mga pulis nga nalambigit sa paggamit og gidiling drugas.

Kini tungod kay subay sa statistic matod ni Calibo 50 porsiyento sa mga krimen naglambigit sa gidiling drugas maong wala nay nawong ang mga pulis nga nalambigit sa pagbisyo niini.

Matod ni Calibo makigtagbo siya kang Valmoria ug hepe sa Aloguinsan nga si Insp. Jose Rovic Villarin aron mapadali ang dismissal proceedings batok kang Agcol.

Si Agcol sugod niadtong Miyerkules gibutang sa Provincial Security Service Group sa CPPO subay sa kamandoan ni Valmoria.

Nunot niini gipahimangnuan ni Calibo ang tanang mga pulis dinhi sa Central Visayas nga likayan gyud ang gidiling drugas.

Giangkon hinoon niya nga mao pa kiniy una niyang kaso nga nasugatan batok sa pulis sukad sa iyang pag-asumir isip director sa Napolcom -7 .