Si Kongresista Eduardo Gullas ug kaalyado sa mayor sa Talisay nga si Socrates Fernandez mitambag nga ipasulod sa rehab ang kontrobersyal kaayo niining anak nga si Joavan aron mawagtang na ang gibating kahadlok sa mga Talisaynon.
Gibutyag ni Gullas nga gipatawag niya si Fernandez aron hisgutan ang problema niini sa iyang anak.
Mibati ug misabot si Gullas sa sitwasyon karon sa mayor sanglit susama sa naulahi duna sad siya’y bugtong anak nga lalaki apan angayan usab nga huna-hunaon ni Fernandez nga amahan usab siya sa kadaghanan tungod kay mayor siya sa usa ka dakbayan.
Gipapili niini si Fernandez kung asay palabihon nga makitang “buhi” ang iyang anak sulod sa rehabilitation center o makita kining “gihaya” kung ugaling dunay tawong di na makapugong ug mobutang na sa balaod sa ilang mga kamot.
Si Gullas nagkanayon nga angayang pasagdan ni Fernandez ang awtoridad sa kaso ni Joavan.
“Let the authorities handle it and then let the law run its coarse, have him before the rehab,” matud ni Gullas.
Gipahinumduman usab ni Gullas ang mayor nga si Joavan nagtagamtam lang og temporaryong kagawasan gikan sa kasong pagpatay batok niini tungod usab sa pagtugot sa korte nga siya makapiyansa.
Matud pang Gullas human makapiyansa niadto si Joavan gitambagan na niini ang mayor nga ipa-rehabilitate ang anak ug karon na usab ang ikaduhang higayon nga iya kining gisugyot ug nanghinaot ang amahan sa distrito nga siya paminawon.
Gitambagan usab ni Gullas nga magpatabang ang mayor sa mga higalang kaparian ilabi na kang Monsignor Jose Montecillo sa Argao aron pag-awhag kang Joavan nga boluntaryong mosulod sa rehabilitation.
Sa laing bahin, si Gullas ang giawhag niya ang Provincial Police Director, Carmelo Valmoria nga ipa-monitor ang moral sa kapolisan ug sitwasyon karon sa kapolisan sa dakbayan sa Talisay kay naputos na kini sa mga kontrobersiya.