Imahen sa polis usbon – Abarquez

Si Bise Mayor Lani Abarquez nagtinguhang mausab ang imahen sa kapolisan sa dakbayan sa Talisay aron mahibalik ang pagsalig sa mga Talisaynon niini.

Usa sa napakibra sa pagsalig sa katawhan sa kapolisan sa maong dakbayan mao ang pagkalambigit sa pipila niini , puyra lang sa maayo, sa pipila ka mga kontrobersya gumikan sa giingong “negligence” kon pagkadanghag sa ilang trabaho.

Si Abarquez sa pakighinabi sa mga tigbalita nagkanayon nga iyang gipangutana si Superintendent Romeo Perigo, ang hepe sa Talisay Police Station kung gihatagan ba usab niini og aksiyon ang laing mga kaso gawas sa kaso sa anak ni Mayor Socrates Fernandez nga si Joavan Fernandez.

Miingon si Abarquez  nga nasuta niya nga giatiman  usab sa kapolisan ang ubang mga kaso sa mga Talisaynon.

Karong adlawa ang bise mayor  nagpatawag og meeting  sa mga kapitan sa barangay sa dakbayan aron tuki-on ang bahin sa kahapsay ug kalinaw ug ang ilang baroganan bahin sa mga nahitabo diin dunay kalambigitan ang anak sa mayor.

Sa laing bahin, gibutyag ni Abarquez nga si Joavan  usa sa mga kawani sa city hall ubos sa buhatan sa iyang amahang mayor apan wala siya kahibalo kung haing  departamentoha kini madestino.

Hinuon miingon ang  bise mayor nga ipasusi pa niya kini kung kawani pa ba gihapon sa city hall si Joavan o dili na.

Si Abarquez midugang nga niining mga panghitabo sa dakbayan angayang mohatag sa ilang tabang ang  tanan.