‘Drug user’ nga polis gi-relieved

Girelibuhan sugod kagahapong adlawa sa pangulo sa kapulisan sa probinsya sa Sugbu ang polis sa lungsod sa Aloguinsan human migawas  nga positibong tiggamitan og ginadiling drogas.

Si CPPO director Sr. Supt. Carmelo Valmoria  sa press conference kagahapon mitug-an nga iyang giparelibuhan si PO1 Dave Agcol ug gidestino na karon sa Provincial Security Service Group (PSSG) diha sa CPPO.

“Starting today I will relieve him (Agcol), he is no longer effective in Aloguinsan to enforce the law being a drug user. And there is no more moral ascendancy to run after them (drug pushers and users) because he himself is drug user, we have strong case against him,” nagkanayon si Valmoria.

Matud ni Valmoria iyang gituyo nga anha sa PSSG idestino si Agcol aron sa ingon makit-an pirme matag karon ug unya, kaysa idestino sa laing police station sa kalungsoran.

Kasong grave misconduct ug laing kasong criminal sa section 15, sa Akta Republika 9165 ang atubangon ni Agcol, matud pang Valmoria.

Niingon si Valmoria usa ka warning ngadto  sa ubang mga polis nga naghimo og susama sa gibuhat ni PO1 Agcol tungod kay base sa iyang patakaran wagtangon ug tangtangon sa serbisyo sa PNP  ang nagpabadlong  niyang mga sakop.

Sa pagkakaron ang kaso ni Agcol anaa pa sa Provincial Investigation and Detective Management Branch (PIDMB) nga gipangulohan ni Supt. Anthony Bagarinao apan matud ni Valmoria iyang iduso ngadto   sa PRO-7.

Sa nasayran si Valmoria nakadawat og report nga tiggamitan og ginadiling drugas si PO1 Agcol uban sa laing mga polis diha sa Aloguinsan hinungdan gipailawom gilayon sa surprise drug test sa milabay’ng bulan sa Hulyo  ug nasuta nga positibo base sa resulta sa confirmatory test sa PNP-Crime Laboratory.

Nunot niini gihangyo ni Valmoria ang publiko dili magpanuko kaniya  sa paghatag og impormasyon niadtong mga polis sa ilang dapit nga badlongon aron iya dayon kining himuan og pakisusi.