Comendador: Silota’g bug-at si PO1 Bayato

Labing bug-at nga silot subay sa ebidensiyang makuha ang ipahamtang ni Sr. Supt. Patrocinio Comendador batok sa usa ka polis nga giingong hubog nga mimaneho sa Toyota Innova Patrol Car nga nakadasmag sa laing patrolcar diha sulod sa General Services sa dakbayan.

Si Comendador sa pakighinabi sa mga tigbalita mitug-an nga dili lang kini maoy labing unang higayon nga iyang nadungog nga hubog si PO1 Crisostomo Bayato nga nagdala og patrolcar, gani gipatawag na niya kini kaniadto tungod sa susamang rason.

Si Bayato kasamtangan karong gibalhin sa beat patrol aron di na makamaneho og sakyanan sa kapolisan samtang padayong gihimo ang imbestigasyon ni Chief Insp. Arnel Banzon, hepe sa Mobile Patrol Group tungod sa kasong administratibang less serious neglect of duty.

“I already advised Banzon to meet out the maximum penalty,” matud pang Comendador.

Si Comendador isip city director dunay  gahum nga makahatag og 15 ka adlaw nga suspension nga walay suhulan ug benipisyong makuha sa usa niya ka sakop nga mamatud-ang sad-an ug nilapas sa mga lagda.

Daan nang mibahad si Mayor Tomas Osmeña human masayod sa maong insidente niadtong milabay’ng weekend nga iyang ipasuspenso ang maong polis, ang City hall maoy nipalit sa maong mga sakyanan ug gipagamit ngadto sa CCPO.