Bag-ong ‘guidelines’ pagbalita sa mga batang biktima o suspek gitun-an

Dunay gihimong konsultasyon alang sa bag-ong ipatumang guidelines unya ang Department of Justice pinaagi sa ilang Special Committee for the Protection of Children aron mas masigurong protektado ang kabataan suspek man sila ug biktima.

Kagahapon, si Under Secretary Linda Malenab-Hornella kinsa mao usab ang acting chair sa Special Committee for the Protection of Children ug mga resources persons nakigkonsultasyon sa lokal nga media dinhi sa Sugbu kabahin niini.

Pipila ka mga sakop sa media ang mipasabot nga daw gipugngan sa maong mga guidelines ang kagawasan sa media ilabi na kung ang public interest ang hisgutan.

Duna say mikwestyon nganong ang media ra maoy gihimoan og susama niining guidelines nga gikunsiderar sa panel nga usa ka maayong pangutana ug misaad nga duna sad silay himuong linaing guidelines sa ubang mga ahensya sa gobiyernong maoy malambigit sa susamang mga kaso.

Kini mao ang PNP, ang DSWD, ang mga korte ug piskalya, ang medico-legal ug uban pa, gumikan kay sagad sa rason sa mga sakop sa media kining maong mga ahensyaha maoy kulang og control sa ilang mga sakop nga mapugngan ang mga impormasyon ug mga detalye sa panghitabo nga makadaot sa kaugmaon sa mga menor de edad nga malambigit sa krimen.

Kini partikular sa mga pribadong impormasyon mahitungod sa pagkatawo sa nalambigit nga menor de edad nga wala nay gamit para sa pagsulat sa balita apan dako og epekto unya sa kaugmaon niini.

Mipasabot ang mga resource speakers tumong sa maong bag-ong guidelines mao ra gyud ang “welfare” ug kung unsay “best interest” alang sa mga menor de edad tungod kay giisip silang mga biktima sa panahon.

“Public interest is not what is interesting to the public, they are not the same,” sumala pa sa usa sa mga resource persons.

“The guidelines do not prohibit us in making a story, the prohibition is only for the protection of the children,” dugang pang Atty. Rudolph Steve Jularbal sa Kapisanan ng mga Brodkaster ng Pilipinas.

Maong ang ubang mga detalyeng direkta o di direktang magtumbok sa pagkatawo sa bata bisan wala kini hinganli maisip na nga kalapasan sa kasamtangang nalatid na sa balaod.

Giawhag sa committee pinaagi sa pandayong guidelines ang mga tigbalita nga balanse apan de kalidad nga balita lang ang ipagawas pinaagi sa di pag-sensationalized sa estorya aron sa ingon di mauwawan ang nalambigit nga menor de edad.

Nahisgutan usab ang kakulangon sa mga programa, pasilidad ug pag-monitor sa mga hingtungdang ahensya sa kabataan nga maoy usa sa hinungdan nganong daghan gihapong mga bata ang nalambigit sa krimen.

Gihisgutan usab ang problema sa gubat diin sagad maapektahan mga sibilyan ilabi na ang kabataan. Ingon man ang mga hulagway sa mga batang magpakita sa ilang makaluluoy nga sitwasyon.

Gipaabot nga human malibot sa komitiba ang ubang mga dapit sa nasud mopagawas sila og bag-ong guidelines isip rebisyon sa kasamtangan guidelines nga gipagawas niadtong 2000.