Bukid sa Catmon nihulpa

Dili momenus 28 ka mga panimalay ang apektado dihang mihagsa sa usa ka bahin sa bukid diha sa sitio Gintigi-an sa barangay Cabunga-an sa lungsod sa Catmon sa nahitabung landslide.

Sumala pa sa mga opisyal sa maong lungsod gibana-banang niabot og tres ngadto sa kwatro hektaryas ang gilapdon ug kinse ka tiil ang gilawmon sa pagkahulpa sa yuta sa bukirang bahin sa maong barangay nga may gilay-ong unom ka kilometro gikan sa highway.

Gibutyag sa Municipal Planning and Development Coordinator nga si Nelson Ares dihang nahinabi sa Banat News unang na-report sa ilang buhatan ang maong landslide niadtong petsa 31 sa Hulyo diin nahulpa lang ang may 100 metros nga luna ngadto sa 15 ka tiil ang gilawmon diin tulo ka balay ang nangagusbat.

Apan niadtong miaging semana nakadawat og report gikan sa mga opisyal sa barangay si Mayor Estrella Aribal nga nag-anam og kadako ang liki sa yuta diha sa maong  lugar ug nagpaingon sa ubos ug nagsugod na og irog ang tanang matang sa mga tanom ug bato sa ibabaw niini.

Niadtong Biyernes gisusi dayun sa mga opisyal sa lungsod ang maong lugar ug gi-report sab kini ngadto sa Mines and Geo Sciences Bureau nga maoy nipahigayon sa pakisusi nga gikuyugan ni Rep. Red Durano sa kinto distrito.

Nangapod-apod usab niadtong adlawa og mga bugas ug noodles ang munisipyo sa mga pamilyang naapektahan nga kasamtangan karung nagpuyo sa ilang mga paryente sa mga sikbit nga barangay.

Wala hinooy gikatahong naangol o nakalas atol sa maong landslide gawas lang sa daghang kadaut sa mga pananom sa maong lugar.

Nianang pagkahapon palang daan dihang nagsugod og pangliki ang yuta una pa mahunlak nakabantay na ang mga residente sa lugar hinungdan nga mihunong na sila og pangatulog sa ilang mga balay panahon sa gabii.

“Duna nay nangatumba nga punoan sa mangga, lubi, kamaisan ug duna pay humayan nga naagi-an ni-crack nga yuta nahubsan na pod og tubig,”dugang asoy ni Ares.

Matud ni Ares mokabat lang sa 13 ka mga panimalay ang nangaguba human maigo sa nahulpa nga yuta samtang ang ubang mga balay gipabiyaan lang una sa mga nagpuyo tungod kay ang ilawom nga bahin sa silong sa maong mga balay nagsugod na usab og pagpangliki.

Gidugang ni Ares  apil sa naapektuhan ang ilang karsada nga farm to market road sa maong lugar tungod kay niabot na sa karsada ang liki nga gihulagway nila nga nagpunay og irog.

Nabalaka ang mga opisyal sa lungsod nga mosamot pa og ka grabe ang sitwasyon unya kung magsige na og ulan.

Samtang ang mga pamilyang apektado gimandoan sa mayor nga dili una mobalik sa ilang panimalay hangtod dili mopagawas og report ang DENR kun luwas na bang puy-an ang maong lugar.