Usa ka sakop sa Aloguinsan police station ang migawas nga positibo sa paggamit sa ginadiling drugas human mogawas ang resulta sa gihimong random drug test diha sa mga sakop niini.
Si Cebu Provincial Police Office Chief Sr. Supt. Carmelo Valmoria miila sa maong polis nga si PO1 Dave Agcol, base sa resulta sa drug test nga gihimo niadtong bulan sa Hulyo ning tuiga.
Si Valmoria nagkanayon human nigawas nga positibo sa paggamit sa ginadiling drugas si Agcol ila dayong gipaubos sa confirmatory test ug nakunpirmar gyud sa PNP-Crime Laboratory -7 nga positibo kini sa gidiling drogas.
Matud pa ni Valmoria ang maong drug test gihimo gumikan sa iyang nadawat nga report gikan sa mga concerned citizen kabahin sa giingong paggamit og iligal nga drogas sa pipila ka mga polis diha sa maong lungsod.
Nasayran nga si Agcol nadestino kaniadto sa dakbayan sa Talisay apan gumikan sa pagkalambigit niini og kontrobersiya gipalabay kini ngadto na sa barangay Campoot, lungsod sa Tuburan una pa gibalhin sa lungsod sa Aloguinsan.