Dalaga na-hit and run

Patay ang usa ka batan-ong babaye human madasmagi sa usa ka wala matinong sakyanan sa sitio Tacan barangay Ibo dakbayan sa Lapulapu kagahapon sa kaadlawon, samtang usa ka Koryano napasok sa bakery diha sa sitio Datag barangay Maribago sa susamang dakbayan kagahapon sa kaadlawon.

Ang biktima sa “hit and run” mao si Michel Villarin, 19, kasamtangang nagpuyo sa maong dapit ug usa ka factory worker nga sumala pang PO2 Jude Marifosque sa traffic division kuyog sa iyang apohan  niadtong tungura pagkahitabo.

Ang duha naglakaw daplin sa dalan dihang kalit gisakdapan og sakyanan si Villarin hinungdan sa iyang pagkalagpot ug pagkahiagum ug mga bali sa kalawasan.

Si Villarin gidala sa Mactan Doctors hospital apan gideklarar kining patay na, gipangita pa sa kapolisan kung si kinsa ang nakabangga kaniya.

Sa laing bahin, usa ka Ki Won Cho,31, nga usa ka Koryano ang midasmag sa usa ka bakery samtang kini mipaatras sa iyang sakyanan apan nadasok hinuon diha sa Julies Bakeshop nga gipanag-iya ni Roberto Gandianco.

Si Ki nga temporaryong nagpuyo sa KB Homes sa barangay Agus dakbayan sa Lapulapu gikatahong kalit mi-U turn pabalik sa agi apan sa pag-atras niini mideretso ngadto sa bakery.

Walay tawong naangol sa maong insidente apan nagusbat ang display showcase sa maong tindahan.