Konsehal gitulis sa drayber

Usa ka konsehal sa barangay  ang giunay og tulis sa drayber sa habal -habal  nga iyang gisakyan  didto sa siyudad sa Carcar kagahapon sa alas 2:30 sa kaadlawon.

Ang biktima mao si Gonever Enad, 44, ulitawo, ug konsehal sa barangay Sangat, San Fernando, Cebu, samtang ang tulisan  wala pa  mailhi sa kapolisan sa paghimo ning balita.

Matud ni PO1 Renido Villaraiz sa Carcar City Police Station nga nahinabi sa Banat News nga paingon na untang mopauli ang biktima sa Sangat gikang mibisita sa iyang pag-umangkong nagpuyo sa Carcar.

Aron siya madali, mipakyaw siya’g habal-habal diha sa  rotunda sa barangay Poblacion, Carcar  ug nagpahatod ngadto sa  Sangat.

Apan pag-abot nila sa mingaw ug kalibonang bahin sa Perelos, Carcar, mihunong ang suspetsado kay giingong mangihi, apan sa kalit  milanit kini sa iyang armas de fuego ug mipahibawong tulis.

Walay nahimo ang biktima gawas sa pagtugyan sa iyang pitaka nga dunay sulod nga P1,200 uban ang mga mahinungdanong papeles sa sulod ug cellphone niini nga 6010 Nokia.

Unya misirit dayon ang tulisan samtang mibalik ngadto sa kapolisan sa Carcar ang biktima aron sa pagtaho sa maong hitabo.

Giangkon sa biktima nga wala niya matiman-i ang plate number sa habal-habal ug mao usab kini karon ang gipangitaan og solusyon sa kapolisan sa maong dakbayan.