Mopahigayon na usab og inspeksyon ang Cebu City Fire Department sa nagkadaiyang mga establisamento sa dakbayan.
Kini subay usab sa bag-ong direktiba nga giluwatan sa kalihim sa Department of Interior and Local Government (DILG) nga si Ronaldo Puno ngadto sa kabomberohan sa tibuok nasud.
Ang kamanduan ni Puno naggumikan sa sunod-sunod nga mga sunog nga nahitabo didto sa kaulohan sa nangaging mga semana.
Lakip sa mga establisamento nga nangaugdaw mao ang Wellcom Plaza building ug Baclaran Mall sa Pasay ug ang Good Earth Plaza sa Santa Cruz.
Partikular nga ipasusi sa kalihim mao ang fire safety requirement sa mga mall, hotel, hospital ug ubang residential ug commercial building.
Gitataw hinuon ni City Fire Marshall Superintendent Ismael Codilla nga ang ilang himoon mao na lang ang pag-follow-up sa ginagmay'ng kakuwangan sa pipila ka mga balay patigayon.
“Regular man ang atong gihimo nga fire safety inspection, ang ato na lang ana mao ang pag-follow up sa korihianan ba,” sumala ni Codilla.
Nasayran nga lakip sa komon nga mga kalapasan ug kakuwangan sa mga establisamento mao ang kapakyas pagbutang og secondary exit sa projection room niini, walay wet standpipe system, walay standard fire exit o fire doors, walay extension sa fire escape, depektusong manual fire alarm, walay smoke ug heat detector, kakuwang sa battery operated emergency light ug uban pa.
Gihulagway hinuon ni Codilla nga “compliant” ang dagkong mga establisamento sa siyudad gawas sa pipila ka ginagmay'ng korihianan.
Kini maoy subling susihon sa kabomberohan sa dakbayan kung hingpit na ba nga natuman niini ang tanang rekisitos nga nalatid sa balaud.