Hubog nga polis ipasuspensong Tomas

Wala mahimuot si Mayor Tomas Osmeña sa nahitabo niadtong miaging Biyernes sa gabii diha sa compound sa General Services Office (GSO) sa South Road Properties (SRP).

Usa ka polis nga nagmaneho sa Innova Patrol Car nga dunay body number 010 ug may plakang SHN 898, gikatahong nidasmag sa laing nag-parking nga Innova Patrol Car nga dunay body number 016 ug may plakang SHN 888.

Kini niresulta sa pagkalupyak sa walang pultahan sa gidasmagan nga patrol car ug napusgay usab ang walang rear light niini.

Ang labaw nga gikasuk-an ni Osmeña mao ang taho nga hubog si PO1 Crisostomo Bayato nga sakop sa Mobile Patrol Group samtang nimaneho sa patrol car nga nakadasmag og laing sakyanan sa kapulisan.

Kini base usab sa spot report nga gisumitir ngadto sa Cebu City Police Office (CCPO) Operations section human sa insidente.

Gikataho nga ang maong polis patubagon sa iyang labaw nga si Chief Inspector Arnel Banzon ug posibleng mapasakaan og kasong administratiba.

Apan wala pa gani makatubag si PO1 Bayato ngadto sa iyang labaw, si Osmeña nipahibawo na sa Banat News nga iyang ipasuspenso ang nahisgutang polis.

Dili buot ang mayor nga himoong panag-ingnan si Bayato ngadto sa mga kauban niini nga moinom atol sa ilang duty ilabi na kung kini momaneho sa ilang patrol car.

Wala lang hinoon matino kung pila ka buwan ang pagkasuspenso nga ipahamtang ngadto sa nahisgutang polis.

Ang kagamhanan sa dakbayan maoy nipalit sa napulo ka Toyota Innova pipila ka tuig na ang nakalabay ug gipagamit ngadto sa kapulisan sa dakbayan.

Apan kadaghanan sa maong mga sakyanan nakasinati na og mga aksidente sa kadalanan nga naglakip sa kontrobersyal nga hitabo dihang ang usa ka patrol car nakadasmag og taxicab sa paggawas niini gikan sa usa ka motel diha sa North Reclamation Area.

Gibawi sa mayor ang mga Innova patrol car human sa maong hitabo, apan gibalik ra usab niini uban sa paghatag og pasidaan sa CCPO nga maoy manubag kung dunay laing insidente nga malambigitan sa maong mga sakyanan.