Pusil ug kutsilyo nasakmit sa kapolisan

Nagtingkagol sa Talisay detention cell ang tulo ka lalake kinsa nasakmitan og pusil ug  kutsilyo sa mga polis kagahapon sa kaadlawon diha sa barangay Mohon dakbayan sa Talisay.

Ang unang nadakpan mao si Tirso Antone, 25, taga sitio Ranger, barangay Pooc kinsa nasakmitan og usa ka kalibre .38 nga revolver nga dunay upat ka buhing bala.

Ang mga nakasikop kang Antone mao ang kapolisan nga nagpatrolya  nga sila si  PO3 Arnold Damasco, PO1 Martin Key Serling Gorosin III ug PO1 Dennis Onasin, ang tanan sakop sa Talisay City Police Station.

Nasayran sa Banat News nga samtang nagdagan ang patrol car sa maong mga polis, usa ka tawo  ang mipara kanila  ug misumbong nga dunay tawong armado.

Si Antone ang nakita sa mga polis nga naglakaw  sa daplin sa karsada ug ila kining gihunongan unya gimandoang ipataas ang t-shirt niini.

Sa pagtaas sa iyang t-shirt  nabantayan sa mga otoridad ang gitangkil nga armas de fuego niini diha sa hawak hinungdan nga gidiretso siyag karga sa sakyanan ug gibalhog dayon sa prisohan.

Human masikop si Antone, may duha usab ka lalake nga nasakmitan og kutsilyo diha gihapon sa Mohon.

Sila mao  si Stephen Heyrona 19,  taga Ramona Village, barangay Dumlog ug Tristan Nebria 27, taga barangay Mohon.

Nasakmit nila ni Onasin ug sa drayber sa patrol nga si Rufino Catubig gikan kang Heyrona ang kutsilyo nga dunay gitas-ong  12 pulgadas, samtang ang kang Nebria mao ang  siyam ug tunga sa pulgadang kutsilyo usab,

Naaktohan gyud ni Onasin ug Catubig nga nagwara-wara sa kutsilyo ang duha hinungdan nga sayon ra kaayo nilang gisikop ug gidala dayon ngadto sa karsel.

Mga kasong may labot sa illegal possession of deadly weapons ang  gisang-at batok sa mga dinakpan.