Gumikan sa panagbugno sa mga iring naugdaw ang lima ka panimalay ug duha ka silingan pa nga balay ang nadanyos kagahapon sa buntag diha sa Junquera Extension sa barangay Sta. Cruz ning dakbayan.
Gibana-bana sa kabomberohan nga mokabat sa P900 mil ang danyos sa maong sunog apan walay nangaangol sa mga namuyo niini.
Ang maong sunog nahitabo diha sa Ocampo Compound dihang ang nabiyaang nagsigang sug-angan gamit ang LPG gikatahong nadasmagan sa mga nagbugnong mga iring diha sa panimalay ni Lucita Ocampo.
Ang kalayo gikatahong daling mikatap ilabi na sa mga kurtina ug naglisod na ang tagbalay sa pagpawong niini ginamit ang ilang mga fire extinguishers hinungdan nga daling nikatap sa kasikbit nga mga balay.
Ang ubang nangaugdaw nga mga balay nga ginama sa semi-concrete gawas sa balay ni Ocampo mao ang panimalay sa mga kabanay niining gipanag-iya nila ni Maricar Ocampo, Marilou Ocampo, Phoebe Lunde ug Cerila Marqueta.
Samtang natilapan gyud sa kalayo ang mga balay nila ni Valentine Pasia ug Bobby Lozada.
Si Cebu City Fire Marshall Ismael Codilla niisa sa maong sunog ngadto na sa 3rd alarm ug nakontrolar dayon sulod lang sa 15 minutos.
Si SFO2 Alicasim Espinola nagkanayon nga bisan paman sa kadali sa pagkatap sa kalayo dali usab nilang naplastar ang mga fire trucks sa dapit maong wala na makabalhin og ubang panimalay gawas niadtong mga partially burned.
Si Bobit Ocampo pag-umangkon ni Lucita nagkanayon nga nakahimo pa sila sa pagpasirit sa tulo ka mga fire extinguishers apan kalit lang nibuto ang LPG hinungdan nga daling nikatap ang kalayo sa bungbong sa panimalay.
Matud pa niini nga wala diha ang iyang iyaan nga si Lucita gumikan kay nilarga kini sa probinsya sa Negros ug ang umagad lang niini nga ginganlan og Ian maoy nahibilin ug mga bata lakip na ang katabang.
Samtang si Kapitan Jerome Lim sa barangay Sta. Cruz diriyot makakitag sinukmagay human dunay duha ka mga wala mailhing lalaki ang nasuko dihang gibadlong nga dili pasudlon sa lugar.
Kini dihang sila gipangutana sa mga tanod kung kinsay ilang kaila diha sa nasunog nga compound apan wala bisan usa kanila ang nakatubag hinungdan nga gipapahawa sila apan gikasuko kini sa maong mga lalaki.
Wala hinuon kini mosangpot sa kagubot ug dinakpanay dihang may mga bombero ug mga tanod nga mipatunga ug mipalakaw sa maong tawo.
Si Lim nabalakang dunay mga mapahimuslanong tawong manulod ug pangawatan pa ang mga nasunugan.
Kasamtangang gibutang karon sa Sports Complex sa nahisgutang barangay kadtong mga nasunugan, samtang si Konsehal Gerardo Carillo ang hepe sa Cebu City Disaster Coordinating Council ang mipadayag nga ang kagamhanan sa dakbayan sa Sugbu andam sa paghatag og financial assistance sa mga nasunogan.