Drayber gipusil sa polis?

Nalandig sa tambalanan ang usa ka 22-anyos nga drayber sa traysikad human kini pusila niadtong Huwebes sa kadlawon diha sa Ramona Village, barangay San Isidro, dakbayan sa Talisay samtang nagmaneho sa traysikad niining gipamasadahan.

Base sa taho nga usa ka opisyal sa polis ang suspetsado sa maong pagpamusil apan gikompirma kini ni PO2 Lino Diez, polis sa Talisay kinsa maoy nag-imbestigar sa maong insidente nga wala mailhi ang suspetsado.

Ang biktima mao si Rotchen Tayosalan residente sa sitio Dawis, barangay San Roque kinsa nakaangkon og samad pinusilan sa tuong tiil ang daling gidala ngadto sa Talisay District Hospital sa mga tanod kinsa maoy unang nakaresponde sa nahisgutang insidente apan ang biktima ang gibalhin ngadto sa Vicente Sotto Memorial Medical Center niining dakbayan.

Base sa pasiunang imbestigasyon sa polis nga ang suspetsado ang kalit lang mitungha ug gipusil niini si Tayosalan.

Ang kapolisan sa dakbayan ang nakadawat na lang og tawag gikan sa Talisay District Hospital sa maong hitabo hinungdan nga si Diez ang daling mianha sa maong tambalanan aron makuhaan og pamahayag ang biktima kabahin sa insidente.

Si Diez sa pakighinabi niini sa Banat News kagahapon sa hapon mitataw nga sa iyang pasiunang imbestigasyon ang biktima ang namalibad nga wala siya makaila sa mipusil kaniya ug ang suspetsado ang dali usab nga mibiya pahilayo sa lugar nga nahitaboan.

Si Diez midugang nga padayon pa ang iyang pagpahigayon sa follow-up nga imbestigasyon sa hitabo ug gihuwat usab niya nga moanha sa ilang buhatan ang biktima.