Ex-kagawad ‘kuhaag armas

Kanhi barangay kagawad sa barangay Banilad ug karon kawani na sa Cebu City Hall gidakop tungod sa pagtinil og mga armas diha sa iyang panimalay kagahapon sayo sa buntag.

Ang gidakop ug gitanggong na karon sa karsel sa Criminal Investigation and Detection Group-7 giilang si Anecito Ocampo,59, residente sa Ouano Compound sa nahisgutang barangay.

Ang grupo sa CIDG-7 pinanguluhan ni Supt. Rex Derilo, armado sa search warrant batok sa maong kanhi kagawad gikan ni RTC Branch 62 Judge Geraldine Faith Econg.

Nakuha diha sa panimalay ni Ocampo ang usa ka .45 caliber pistol;  usa ka 9mm pistol; usa ka .22  Winchester rifle; usa ka .357 revolver;  usa ka US .30 caliber M2 Carbine Rifle; tagsa ka magazine sa 9mm ug .45 pistols;  pito ka buhing bala sa .45;  20 ka bala sa 9mm; usa ka magazine sa  M2 Carbine Rifle ug 20 ka buhing bala niini; usa ka magazine sa .22 rifle ug duha ka buhing bala niini.

Matud pang Derilo dunay mga reklamo gikan sa mga residente kabahin sa pagpunay og tak-in og armas ni Ocampo diha sa ilang dapit hinungdan nga ila kining gisusi.

Ang CIDG-7 mihimo og pakisusi sa Firearms, Explosives Security Agency and Guards Supervision Section pagtino kung  lisensyadong gun owner si Ocampo apan gikatahong wala kini       marehistro.

Tungod niini ilahang gikuhaan og search warrant ang suspek, sumala pang Derilo nipakita og lisensya si Ocampo sa .9mm apan gikatahong expired na kini ug karon subli pa nilang susihon ang FESAGS bahin niini samtang wala say lisensya ang uban pang nakuhang armas sa iyang balay.

Si Ocampo dihang gihinabi sa mga tigbalia kagahapon miangkong iya ang .9mm ug .45 apan pulos kini lisensyado, samtang ang ubang armas di iya sanglit nakuha kini sa silong sa balay nga gipanag-iya sa pamilyang maoy nagpapuyo kaniya.

Si Ocampo nahimong chief tanod sa maong barangay sukad niadtong 1982 hangtud 1994 ug nahimong kagawad sukad 1994 hangtud sa 2007 sa iyang last           term.

Matud pang Ocampo posibleng ‘frame up’ ang gihimo kaniya may kalambigitan sa iyang 36-anyos nga anak nga si Ronald kinsa gipangita na karon sa kapolisan tungod sa pagpatay sa usa ka bombero nga si SFO4 Wenceslao Opone niadtong Agosto sa milabay’ng tuig.