Bayaw ni Mayor Sitoy gipusil

Bantay Dagat chairman sa Cordova ug bayaw ni Mayor Adelino Sitoy ang gipusil sa miaging kaadlawon sa sitio Calan, barangay Poblacion sa lungsod sa Cordova.

Ang biktima mao si Cecilio Ursal, 54, bana sa igsuong babaye ni Sitoy samtang ang nagpusil mao ang tulo ka mga lalaking usa kanila ang nailhan sa biktima nga mao si Estaneslao Yap, alyas Ontong nga taga Matab-ang, Day-as sa maong lungsod.

Si PO3  Alex Noron nga nahinabi sa Banat News miingon nga nagsakay si Ursal sa iyang motorsiklo pauli sa ilang panimalay sa barangay Gabi sa maong lungsod dihang giatangan ug gipusil sa mga suspek.

Si Ursal nga naigo sa tuong bukton ug tuong tiil og daling gidala sa Mactan Doctors Communit Hospital sa dakbayan sa Lapulapu ug padayon kining giatiman sa mga doktor.

Si Mayor Sitoy sa iyang pamahayag ang nagkanayon nga adunay kalambigitan sa trabaho ang nahitabong pagpamusil sa iyang bayaw sa miaging kaadlawon sanglit higpit man kini nga nagpatuman sa pagsumpo sa mga ilegal nga pagpanagat sa ilang lungsod.

Dugang pa niya nga nagsunod kaniya sa pagpauli sa miaging kaadlawon ang biktima nga gikan sa  pagtambong sa employees night isip usa sa mga nahan-ay nga mga kalihokan sa matag gabii sa tinuig nilang pangilin karong umaabot Sabado.