3 tulisan nasikop

Tulo ka mga tulisan ang nasikop sa usa ka check point sa kapolisan nga gipahigayon sa MJ Cuenco Avenue ning dakbayan sa Sugbo kagahapon sa buntag.

Ang nadakpan mao sila si Melvin Roble, 27, taga Barangay T. Padilla nga sakop sa Alpha Kappa Rho (AKRHO), Sonny Dela Cuesta, 27, taga Marigondon dakbayan sa Lapulapu sakop sa Crips Gang, ug ang ikatulo mao si Robert Mancao, 28, minyo, taga SityoTumoy barangay Pahina Central ning dakbayan.

Ang tulo nasikop dihang mopadulong na untang manulis  sa gisakyan nga PUJ nga nagbiyahian sa rota nga Bulacao-Pardo ug nakuhaan sila og mga   hinagiban.

Si Sr. Supt. Patrocinio Comendador, hepe sa Cebu City Police Office (CCPO) nagkanayon nga ang pagka-sikop sa tulo maoy resulta sa  subsob nga pagpahigayon sa mga  check point diha sa nahisgutang lugar human sa daghang tulis nga nahitabo diha sa A.S Soriano ug dalan MJ Cuenco.

Nagtoo si Comendador nga ang tulo maoy tigpanulis sa maong dapit ug sa mga kasikbit nga dakbayan ug mga lungsod diha sa Norte.

Giawhag niya kadtong  mga nabiktima sa tulis diha sa maong lugar sa pagduaw sa CCPO aron pag-ila usab sa dagway sa maong mga tulisan.

Base sa rekord sa kapolisan nga si Roble niadto lang Pebrero ning tuiga nakagawas gikan sa prisohan sa kasong pagpanulis, si dela Cuesta niadto lang Hunyo 8 nakagawas sa prisohan sa kasong homicide, samtang si Mancao niadtong Pebrero usab nakagawas sa prisohan sa kasong may labot sa illegal drugs.