Dugang batalyon ipadala sa isla sa Negros

Laing usa ka batalyong sundalo ang ipadala sa Central Command sa Negros Island karung bulana sa tinguha nga makuha nila ang target sa pagsulbad sa problema sa insurhensya sa dili pa mahuman ning tuiga.

Si Lt. General Pedro Ike Inserto, Commander sa Central Command nipagawas niining maong pamahayag atol sa pagpanumpa niini sa sobra ka gatusan nga kanhi supporters sa New Peoples Army (NPA) nga nibalik na sa sabakan sa gobiyerno nga gipahigayon sa barangay Linantuyan, Guihulngan, Negros Oriental sa nilabay’ng Agosto Uno.

Ang 43rd Infantry Battalion nga gipangulohan ni Lt. Col. Juvymax Uy gikan sa Bohol maoy ibalhin sa Negros Island.

Gihulagway ni Inserto ang maong batalyon nga “highly mobile force” aron paggukod sa grupo sanglit sumala pa sa report nagkatag-katag na ang NPA.

Gisaway ni Inserto ang liderato sa Komiteng Rehiyonal Sentral Bisayas (KR-SB) kinsa nagbase sa Negros Oriental sa pagmando sa maong armadong grupo aron targeton ang gitawag nga “SHITS” (soft and high impact targets) sama sa cellsites, mining firms, municipal halls ug police stations.

Hinuon gihangyo ni Inserto ang military personnel sa pag-una gihapon sa pagrespito sa tawhanong katungod.

Si Major Christopher Tampus, tigpamaba sa Central Command nihagit sa NPA sa pakig-away sama sa usa ka tinuoray nga manggugubat, pinaagi sa pakig-atubang sa army units ug dili atakihon ang walay ikasukol nga sibilyan ug mga establisamento para lang sa ilang propaganda .