Nagpatabang karon si Cebu City Vice Mayor Michael Rama kang presidential daughter Luli Arroyo pagsulbad sa panginahanglan sa mga forensic experts.
Kini human mipadayag si Mayor Tomas Osmeña nga dili na mupagawas og pundo ang kagamhanan sa dakbayan alang sa mga panginahanglan sa Interpol.
Alang sa mayor nga human na mohatag og tabang ang kagamhanan sa dakbayan sa Sugbu sa mga nabiktima sa pagkalunod sa MV Princess of the Stars(MVPS) ug panahon na nga ang mga galastohan karon abagahon sa tagdumala sa Sulpicio Lines.
Ang Interpol mihangyo nga pahulipan ang ilang nagasto pagpalit sa mga gikinahanglan sa mobile morgue ingon man ang gasto sa ilang pagkaon ug uban pa samtang magpabilin sila dinhi sa Sugbu.
Matud ni Rama nga iya nang gipadangat ang maong panginahanglan ngadto sa kadagkuan sa Sulpicio, apan kini giingong mibalibad.
Kini ang hinungdan nga nakahuna-huna ang bise mayor pagdangop sa nasudnong kagamhanan aron sila na maoy moabaga sa mga galastuhan.
Nasayran nga gipadangat na ni Rama ngadto sa National Disaster Coordinating Council (NDCC) ang maong problema, apan kini giingong wala pa motubag.
Tungod niini, nakahuna-huna ang bise mayor pagpatabang sa presidential daughter aron maoy mosulti sa iyang inahan labot sa gikinahanglan sa mga forensic experts.
Molanat pa og pipila ka buwan ang mga forensic experts sa NBI ug Interpol dinhi sa Sugbu tungod sa ilang gipaabot nga mga patay gikan sa nalunod nga MVPS.
Gituohan nga gatusan ka mga pasahero ang nangatanggong sa sulod sa maong barko, ug kini maoy misyon sa mga forensic experts pag-ila sa mga biktima.
Kini pinaagi usab sa pagkuha og femur bone sa mga patay'ng lawas alang sa cross matching nga pagahimoon, sa nakuha usab nga DNA samples gikan sa mga kabanay niini.
Nasayran nga niabot na ang mobile morgue dinhi sa Sugbu nga gikinahanglan sa mga forensic experts alang sa daling pagkuha og femur bone sa mga biktima.