... Mayor Soc mo-leave

Mayor sa dakbayan sa Talisay mo-leave sa iyang trabaho aron mahatagan og panahon ang iyang anak nga si Joavan matud ni Bise Mayor Lani Abarquez.

Kagahapon ang mga sakop sa konseho sa dakbayan ang mipahigayon og executive session diha sa buhatan sa mayor nga gipatawag ni Abarquez aron tukion ang problema sa mayor sa anak niini.

Matud ni Abarquez nga nakita nila   ang kaguol ni Fernandez ngadto sa iyang anak dihang kini misugyot nga mo-leave una sa iyang trabaho sulod sa duha ka semana sugod karong Agosto 18, 2008.

Kahinumduman nga niining bag-o lang ang anak ni Fernandez nga si Joavan ang nalambigit og mga kontrobersiya una ang pagpanghulgang paulbohon ang Petron gasoline station diha sa barangay Lawaan I, sunod ang giingong pagpangilkil ni Joavan sa biyahidor og kahoy ug ang ulahi mao ang pasangil nga si Joavan ang nangulo sa pagdagit ug pagkulata sa duha ka  manag-agaw nga sila si Osbert Abellana ug Winston Abellana.

Si Abarquez nagkanayon nga tumong sa mayor sa iyaha unyang pag-leave ang paghatag og panahon ngadto sa anak niini ug mipadayag nga isip opisyales sa dakbayan ilaha nga hatagan og moral support ang mayor.

Sa mga hitabo nga nalambigit ang anak sa mayor dili malikayan nga adunay mga ordinaryong Talisaynon ang gibati og kabalaka apan matud ni Abarquez nga kung adunay moreklamo batok sa anak sa mayor kinahanglan nga ilang tinud-on ang ilang reklamo tungod kay adunay mga mireklamo batok kang Joavan nga miatras.

Si Abarquez midugang nga andam siyang mohatag og tabang sa duha ka mga biktima kinsa giingong gikulata ni Joavan ug sa laing lima ka tawo kung moduol kini sa iyang buhatan.