2 ‘milayat’ sa atop, 1 tipi

Usa ang patay samtang lain ang samaran sa dihang duha ka mga batan-on ang gituuhang nangatagak sa usa ka atop sa panimalay diha sa Purok Caimito barangay Canjulao dakbayan sa Lapulapu sa milabay’ng kaadlawon.

 Ang mga biktima mao sila si Arman Patalinjug, 20, ug Michael Dungog, mga residente sa Purok Saging barangay Canjulao dakbayan sa Lapulapu.

 Base sa pasiunang imbestigasyon ni PO3 Joseph Damasco sa Homicide section nasayran nga ang duha diha sa atop sa panimalay ni Demetria Amoin ug gidudahang naghingos og rugby niadtong tungura dihang kalit lang milagubo diha sa ibabaw ug may natagak.

Sa pagsusi sa mga molupyo mao nalay ilang nakit-ang nagbuy-od na ang duha samtang ang usa nag-agulo hinungdan nga sila daling mitawag sa mga sakop sa Emergency Rescue Unit Foundation.

Sa report sa TV Patrol Central Visayas kagahapon gisuwayan pa og hatag og first aid ug CPR sa mga rescuers apan wala na matabang si Patalinjug.

Usa sa mga residente sa maong dapit nga si Marilou Estardo nakakita nga miambak si Patalinjug sa gibanabanang 15 ka tiil nga gitas-on gikan sa atop ni Amoin ug sa pag-abot sa ubos wala na maglihok ang biktima.

 Si Dungog nga misunod sa paglayat sa susamang atop mihilak og  maayo sa dihang patay na ang iyang higala, gani giparok pa ni Dungog ang iyang ulo sa sementadong pader gumikan sa kaguol hinungdan sa pagkahiagum niini og dakong samad sa iyang kilay.

 Ang duha gidali pagdala sa Lapulapu District hospital apan si Patalinjug gideklarar nga dead on arrival sa mga mananambal.

 Pipila ka mga residente sa maong dapit mipadayag ngadto ni Damasco nga kusog mohingos og rugby ang duha ka mga biktima ug posibleng high na kini sa dihang milayat kini sa atop sa panimalay ni Amoin.