Kagamhanan sa lungsod sa Lilo-an ang pormal nga mihangyo ngadto sa Bureau of Jail and Management (BJMP) nga magbutang og official jailer sa Lilo-an Police Station.
Base sa giaprobahang resolusyon sa konseho sa lungsod nga ang pagbutang og mga BJMP guards sa police station makahatag og dakong tabang sa munisipalidad.
Ang pagdumala sa mga piniriso diha sa detention cell sa lungsod nagrisgo sa kapolisan tungod sa kahuot ug sa kakuwang sa budget sa pagkaon posibleng dunay piniriso nga makaeskapo.
Ang maong resolusyon ang gipangamahan ni Konsehal Lurgio Cañete ug gisigundahan ni Konsehal Ferdinand Jumapao III.
Base usab sa nahisgutang resolusyon nga sukad matukod ang Municipal Jail sa Lilo-an wala pa kini makabenipisyo sa pagkabaton og mga specially trained jailers kinsa gibansay alang lang sa maong trabaho.
Sa pagkakaron ang mga lokal nga polis lang sa lungsod ang nahimong mga jailer kinsa nabansay sa pagpanakop niadtong mga malapason ug dili ang sa pagbantay sa mga priso.
Niining bag-o lang ang Cebu Provincial Police Office ang mipadangat na og hangyo ngadto sa BJMP kung aduna ba kini mga jailer nga mapadala nga momando sa detention cell.
Ang Provincial Police Director Carmelo Valmoria ang mibutyag kabahin sa sitwasyon sa ubang mga police station kinsa ang mga polis maoy mahimong jailer ug mag-atiman pa kini sa mga tawo nga moanha sa police station aron motaho sa ilang mga reklamo.
Kahinumduman nga lima ka insidente sa jailbreak ang nahitabo sa buwan sa Pebrero ug Marso niining tuiga diin ang unang insidente nahitabo sa lungsod sa Consolacion niadtong Pebrero 12, 2008 kinsa tulo ka mga piniriso ang nakaeskapo ug pagkasunod adlaw si Valmoria ang miluwat og kamanduan sa pagrelibo sa mga hepe sa police station nga malayasan og nga piniriso.
Walo ka mga piniriso ang nakaikyas gikan sa detention cell diha sa CPPO headquarters sa Barangay Sudlon niining dakbayan apan duha ka adlaw ang milabay si Valmoria ang migama sa iyang one strike policy.