Usa ka ginang ang nalandig sa tambalanan human dunggaba og bolo sa iyang silingang nag-atubang og dakong problema sa pamilya diha sa sitio Mellinium sa barangay Cogon-Pardo ning dakbayan niadtong milabay'ng gabii.
Nakaangkon og mga samad dinunggaban diha sa tiyan ug sa walang bukton ang biktimang si Flormie Tabar, 39, residente sa maong dapit.
Samtang nadakpan usab ug nadis-armahan sa mga silingan ang suspek nga si Panfilo Respicio, 50, human kini gialirungan sa mga tawo pagkahuman sa pagdunggab sa biktima.
Nasayran nga nigawas ang suspek sa balay nga nagbitbit na og bolo ug nagpanghasi ug dihang unang nakit-an ang silingang si John Andrade iyaha kining gigukod ug gihanaang tigbason.
Sa kahadlok ni Andrade dali kining nidagan palayo apan ang biktima kinsa mao pay pagkabantay sa suspek misuway unta og dagan apan naabtan kini diha sa usa ka suok nga dapit ug diha-diha giluba sa suspek makadaghang higayon.
Ang mga tawo pagkahibalo sa gihimo ni Respicio daling miresponde ug nanawag og mga polis sa Pardo ug mialirung kaniya hangtud nga kini nadis-armahan ug nadakpan.
Igo nalang giturn-over sa mga tawo ang suspek ngadto sa mga polis samtang gidala ang ginang sa tambalanan.
Nasayran sa imbestigasyon ni SPO4 Alex Dacua sa Homicide Section nga dunay wala pa matinong problema sa pamilya ang biktima niadtong tungura maong kalit nga nagwala.