13-anyos gilugos

Nagtingkagol sa karsel sa kapulisan sa lungsod sa Catmon ang usa ka 21-anyos nga lalaki human kini gipasanginlang nanglugos sa ilang 13-anyos nga silingan niadtong Biyernes sa hapon sa sitio Ylaya barangay Panalipan sa nahisgutang lungsud.

Ang gibalhog giila sa kapulisan nga si Antolin Bejoc, nagpuyo sa nahisgutang lugar human gi-reklamo sa mga ginikanan sa minor de edad.

Matud pa ni PO3 Ulysses Bermoy sa Police Station sa Catmon nga gikahinabi sa Banat News nga ang ginikanan sa bata maoy ni-report sa ilang buhatan nga gilugos ang ilang anak sa suspetsado mga alas 4 kapin ug kulang sa hapon niadtong Biyernes.

Hinungdan nga ang ilang mga kaubanan pinanguluhan ni Police Sr. Insp. Alvin Ballo ug mga kaubanan daling nisuhid sa sitio Ylaya ug gisignit si Bejoc.

Sumala pa niini nga nagpaabot nalang usab sila karon sa resulta sa medical examination kun nahilabtan ba gyud ang bata.

Ang akusado gikatahong hugtanong nihimakak sa pasangil ug gani ang mga kahigalaan niini nibutyag nga atol sa maong oras nag-referee pa kini sa duwang basketball hinungdan nga nahibulong nalang sila nga gisignit sa kapulisan.

Samtang ang akusado kasamtangan lang unang gitanggong sa karsel sa kapulisan sa maong lungsod.