‘Pusher’ nakaipsot sa raid

Ubay-ubay’ng mga shabu ug kagamitan sa pagsuyop niini ang nasakmit sa mga sakop sa City Anti-Illegal Drugs Special Operations Task Group sa Cebu City Police Office diha sa usa ka panimalay sa gipasanginlang drug pusher diha sa barangay Bulacao.

Ang CAIDSOTG pinanguluhan sa hepe niini nga si Supt. Pablo Labra mironda sa panimalay ni Christian Quidato, usa ka gidudahang drug pusher diha sa maong dapit.

Si Sr. Insp. George Ylanan usa sa mga nironda sa maong balay nagkanayon nga naa sa level 2 base sa impormasyon ug naa usab sa drug personality watch list sa dakbayan si Quidato.

Armado sa search warrant nga giluwatan ni RTC-7 branch 17 presiding judge Silvestre Maamo,Jr. tungod sa kalapasan sa RA 9165 gironda sa mga polis ang panimalay human makumpirmar ang iyang presensya sa panimalay.

Apan ang kapolisan napakyas sa pagsikop kaniya gumikan kay giingong layo sa main road ang agianan pasulod sa gihimutangan sa balay sa suspek ug gibarikadahan usab ang pultahan sa balay niini maong dali kini kaayong nakabantay ug nakaipsot.

“Naglisod mi dayon og sulod kay sikit-sikit ang mga konkretong balay lisod i-secure unya layo pa gyud sa main road ang balay, barricaded pa gyud ang pultahan,” asoy pang Ylanan sa Banat News.

Bisan wala na diha ang suspek inabagan sa mga barangay tanod isip witness gipadayon sa kapolisan ang pagrekisa ug niresulta sa pagkasakmit sa upat ka dagkong plastik, duha ka medium size, upat ka gagmay’ng pakete nga tanan pulos dunay sulod nga gidudahang shabu.

Nakuha usab ang nagkadaiyang drug paraphernalia pagsinghot ug pag-repack niini, lakip sa nakuha ang usa ka walay sulod nga magazine sa kalibre .45 ug usa ka basiyo sa kalibre 9 mm.