Magtiayon gidakop

Magtiayon gibalhog sa karsel sa Carcar police station atol sa pagdakop sa banang wanted sa kasong murder dihang ang asawa gikatahong mikuninit sa mga polis nga midakop niadtong Lunes sa buntag sa sitio Tapal sa barangay Guadalupe.

Ang nadakpang wanted giila nga si Jeniboy Diabelos, 47, human malutsi sa warrant of arrest nga gi-isyu ni Judge Ireneo Gako sa Regional Trial Court samtang ang asawa niini nga si Lucian, 47, gibalhog usab sa karsel human nibabag ug nisuway sa pagtamparos sa mga polis ug nakignilayugay aron di dakpon ang iyang bana.

Si PO1 Reniedo Villarais sa Carcar Police Station nga gikahinabi sa Banat News nagkanayon nga si Diabelos nag-atubang sa kasong murder human mapatay ang iyang bayaw.

Gikatahong kini nahitabo dihang silang duha nailog sa armas dihang nanghagis ang iyang bayaw niadtong 2004.

Matud pa ni Villarais nga karong Lunes ilang ipresentar sa korte ang suspek subay sa kamandoan sa warrant of arrest samtang pasakaan usab nila’g kasong obstruction of justice niini dihang nakignilayugay kini nila ni SPO1 Meleton Agadier ug mga kaubanan.

Matud pa niini nga ni-interbiner ang asawa ug nibabag gyud ngadto sa mga police dihang gi-serve ang warrant of arrest sa iyang  bana hinungdan nga    nahitabo gayud ang gamay’ng kaguliyang.