Tawo wa masayod nga giluba

Usa ka tawo nga  nakig-inom sa iyang mga higala sulod sa usa ka videokehan sa Hernan Cortes sa Subangdaku, dakbayan sa  Mandaue  nagpahatod sa tambalanan pagkamatngon niyang nabulit sa mga samad dinunggaban sa iyang lawas niadtong Biyernes sa gabii.

Si SPO2 Alfredo Andales sa Presinto 2 sa Subangdaku Police Station miila sa biktima nga mao si Vincent Rudolfh Yaon, 43,  minyo, ug lumad nga taga Medellin, Cebu.

Matud  pa ni SPO2 Andales nga padulong na sa iyang gipuy-ang balay ang biktima ug misakay og taxi dihang namatikdan niya nga mibuhagay  ang dugo gikan sa iyang lawas.

 Maoy hinungdan nga imbis mouli sa ilaha, mideretso nalang siyag pahatod sa taxi  ngadto  sa Perpetual Soccour Hospital sa dakbayan sa Sugbo.

Ang biktima wala masayod kun kinsay midunggab kaniya gumikan sa iyang subrang kahubog.

Si SPO2 Andales miingon nga ilang nasayran ang maong hitabo dihang ang  nurse on duty sa maong tambalanan maoy nanawag sa ilang buhatan ug nagpahibalo sa nahitabong pagpanunggab.

Gitataw ni SPO2 Andales nga luwas hinuon ang biktima gikan sa tinong kamatayon.