Nagduda ang kapolisan sa dakbayan sa Sugbu nga ‘inside job’ ang nahitabo sa paglungkab sa Unitop Shopping Center diha sa eskina sa dalan D. Jakosalem ug Osmeña Blvd sa barangay Sto. Niño.
Si Sr. Supt. Patrocinio Comendador mitug-an sa mga tigbalita nga imposible kaayong matultulan dayon ang maong vault nga gisudlan sa nahanaw nga P300 mil kung walay tawong nihatag og impormasyon ngadto sa mga kawatan.
Sa pagkakaron wala pa gihapon mailhi ang maong mga kawatan apan duna nay grupong ilang gidudahan nga mao ang “vault gang” kansang modus operandi ang pangabli og vaults sa mga tindahan.
Usa usab sa susihon sa Theft and Robber Section mao ang posibleng kalambigitan sa pipila ka mga empleyado usab sa mga silingang establisamento nga posibleng nakatabang sa mga kawatan sa paghatag og impormasyon kabahin sa agianan padulong sa Unitop.
Ang kapin sa duha ka tawong gidudahang maoy responsable gikatahong diha moagi sa luyong bahin sa Unitop duol sa usa sa mga silingang establisamento diin makit-ing nagkutay pa ang habol nga gisumpay ug maoy gidudahang giagian.
Matud pang Comendador, ilang kuhaan og tagsa-tagsa ka pamahayag ang mga empleyado ug mga gwardiya sa Unitop nga nakahibalo ug nakatultol kung asa ang vault nga maoy butanganan sa kwarta.
“Because the vault location needs specific information where it is located, we will be conducting interviews with the security guards, employees and other personnel who might have knowledge on the location of the vault,” sumala pang Comendador.
Lakip na niini ang naandang sistemang gipatuman sa maong tindahan may labot sa ilang pagdeposito sa kinitaan diha sa bangko aron masubay kung duna pay laing tawong posibleng nasayod niini.