Biyuda ni Arrogante nagpakitabang sa taga Daanbantayan

Nanawagan ang biyuda sa gipatay nga magpapatigayon sa lungsod sa Daanbantayan ngadto sa katawhan nga mobarog aron makab-ot na gayud ang hustisya sa kamatayon sa iyang bana.

Si Ginang Juliet Arrogante, biyuda sa gipatay nga si Renerio “Gogong” Arrogante III mipadayag niini sa mensahe nga iyang gipaabot ngadto sa mga molupyo sa lungsod dungan usab sa pagtimaan sa ikalima ka buwan nga sumad sa pagpatay sa iyang bana.

Hinoon si Juliet atoa pa sa nasod sa Australia apan nakita niya nga ang pagpakabana sa mga mulopyo sa lungsod sa Daanbantayan dako kaayo og matabang aron makab-ot ang hustisya sa kamatayon sa bana ug dako iyang pagpasalamat niini.

Apan matod pang Juliet mas dako ang iyang kalipay kun mamatud-an na gayud kinsa ang mga tawo nga nagpaluyo sa kamatayon sa iyang bana.
“Please tabangi ninyo ang pagsulbad sa pagkamatay sa akong bana ug atong amigo nga si Gogong Arrogante. Kung naa kamo’y nahibaw-an, duna kamo’y impormasyon nga nasayran, nakikiusap akong pwede ninyo akong kontakin, makig istoryahay kita, sa ako, sa akong mga anak, sa mga Justice For Gogong Members ug sa NBI kaha. Sa mga tawo nga motabang duol lang kamo kanamo usab kamo among tabangan,  ayaw kamo kabalaka kay bisan ako maghuwat hangtud ang hustisya sa pagka matay sa akong bana ato nga makita,” dugang sa sulat ni Juliet nga gipadangat sa mga tigbalita.

Midugang siya nga mao na karon ang panahon nga ipakita nila nga sila mibarog alang sa kaayuhan sa tibuok lungsod sa Daanbantayan.

Nabalaka si Juliet nga ang nahitabo sa iyang bana mahimong mahitabo usab sa mga tawo sa lungsod sa Daanbantayan.

Gipaabot na niya kang Presidente Gloria Macapagal Arroyo ang iyang awhag sa panawagan sa hustisya sa iyang bana kinsa gipusil patay atubangan niya ug anak nga si Renren niadtong sayo sa buntag sa Marso 9.

Usa ka Sgt. Moises Ludoc ang gidakop human kini gitumbok nga maoy mipusil apan daghan ang nagtuo nga si Ludoc gisugo lang og mga tawo paghimo sa maong krimen.