Papa sa bise mayor sa Sibonga gitulis

Gitulis sa duha ka mga armadong lalaki ang usa ka negosyante ug amahan ni Bise Mayor Nestor Ponce sa lungsod sa Sibonga samtang namalit kini og kopras sa bukirang bahin sa barangay Tubod niadtong nilabay’ng Martes sa alas 10:30 sa buntag.

Ang biktima mao si Eugenio Ponce, 73,taga barangay Poblacion samtang ang duha ka lalaki nga suspek wala pa gihapon mailhi.

Gibanabanang mokabat sa P200 mil ang sulod sa bag  nga nasakiyo sa mga tulisan sumala pang PO1 Dandie Molo sa Sibonga Police dihang nahinabi sa Banat News.

Gikatahong nibiyahe ang biktima sa bukid aron pagpamaligya og bugas sa mga suki niini ug nagdala usab kini og kwarta aron i-kompra niadtong mga ibaligya nga kopras sa maong lugar.

Samtang nanimbang og kopras ang drayber ug truckboy kalit nga miduol ang duha ka suspek nga armado og tag-as nga kalibre sa armas dayong tion kanila.

Wala sila makapalag dihang gikuha sa usa sa mga tulisan ang gibitbit nga bag ni Ponce ug dayung sibat pahilayo.

Kagahapong adlawa dunay gi-pick-up nga suspek ang kapulisan inabagan sa Regional Mobile Group (RMG) tungod kay giingong mitakdo ang deskripsiyon niini sa usa sa mga suspek apan gibuhian usab kini dayon human makit-i sa biktima.