Nagtingkagol sa karsel sa Guadalupe Police Station ang usa ka 34-anyos nga panday human pasanginling nilugos sa usa ka lady guard nga higala sa iyang asawa human siya ug ang maong gwardiya naabtan sa ilang pag-umangkong pulos wala nay sapot diha sa sala kagahapon diha sa sitio Kanaas sa barangay Guadalupe.
Ang gibalhog sa prisuhan mao si Boboy (tinuod pangan ug apilyedo gipugngan) gisikop sa kapolisan human isumbong sa mga pag-umangkon niini ang ilang nakita diha sa lawak.
Ang 39-anyos usab nga dalagang lady guard kinsa gikatahong hubog kaayo nianang milabay’ng gabii tungod sa pakig-inom sa asawa sa suspek nagkanayon nga wala siya makabatyag nga siya gilugos nianang gabhiuna apan nahibulong nalang nga wala na siya’y sapot ug may mga lama diha sa iyang kinatawo ug may daghang mga ‘tsikinini’ sa iyang liog ug ubang parte sa lawas.
Gumikan niini siya mipahiling dayon ngadto sa Vicente Sotto Memorial Medical Center ‘pink room’ aron matino kung duna bay mipanamastamas kaniya.
Dihang gihinabi sa Banat News ang biktima nagkanayon nga nibisita siya sa iyang amigang asawa sa suspek niadtong Martes sa hapon ug nagkasabot nga mag-inom silang duha hangtud nga sila nangaluro sa bino ug diha na makatulog sa panimalay sa magtiayon.
Ang suspek nga gikahinabi sad sa Banat News hugtanong nihimakak sa pasangil ug wala siyay gihimong dautan sa higala sa iyang asawa maong nahibulong nalang siya dihang gipukaw sa mga police.
Miangkon kining alas 3 pa sa hapon nag-inom na ang iyang asawa ug ang biktima sa ilang balay, sa iyang pagbalik human sa tulo ka oras nidiretso siyang nakig-inom sa iyang mga kaparyentihan
Nianang pagkatungang gabii na sila nalang tulo sa iyang asawa ug biktima ang nahabiling nag-inom ug samtang nagsayaw-sayaw ang duha ka babaye kalit lang nangahagba ang duha gumikan sa kahubog ug nidiretso og pangatulog sa sala.
Gumikan kay siya hubog na usab kaayo niligid nalang siya aron matulog dili layo sa gihigdaan sa asawa ug sa biktima diha sa sala.
Iya usab gibarugang naandan na niyang matulog nga hubo ang tanang sapot ilabi na kun siya nakainom apan kusganon siyang mihimakak nga iyang gilugos ang reklamante.
Hasta ang gituuhang “kiss marks” diha sa iyang liog wala usab niya mahinumdumi kung si kinsay nihimo, aron sa paglimpyo sa iyang kaugalingon gisugyot niining ipa- eksamin ang reklamante.
Gibasol niini ang pag-umangkon sa iyang asawa nga maoy nagbutang-butang og sala kaniya tungod kay kini dunay kasuko kaniya.
Apan ang asawa mismo sa suspek lahi og bersyon sa gitug-an sa iyang bana, matud pa niya nga wala kini matulog sa sala kundili diha sa taas sa ilang balay ug dihang siya ug ang pag-umangkong lalaki ninaog nakugang sila nga pulos na naghubo ang duha.
Ang suspek gidakop nila ni Inspector Miguelo Bondoc, SPO3 Jayme Toring ug SPO1 Eduardo Deligero ug gipaabot nga mopasaka og kaso ang asawa ug ingon man ang biktima batok kaniya. (Uban ni Rey Pasaporte)