Ginang namaak sa tanod gipriso

Nagtingkagol sa Talisay detention cell ang usa ka 54-anyos nga ginang human kini giingong namaak sa tanod nga miuwang kaniya dihang nanghasi kini niadtong  Martes sa gabii diha sa barangay Cansojong, dakbayan sa Talisay.

Ang suspetsado giila sa kapolisan nga si Edna Dumael, residente sa nahisgutang lugar kinsa giingong hubog dihang nahitabo ang maong insidente.

Ang mireklamo batok kang Dumail mao si Paulita Canastra, 51,  residente usab sa maong lugar.

Ang biktima ang mibahad nga mopasaka og kaso batok sa suspetsado.

Base sa taho nga si Dumail ang giingong nanghasi ug gibunal-bunalan og sungkod ang bana niining paralitiko tungod sa personal nga hinungdan.

Ang bana ni Dumail ang naglain og puyo diha sa balay ni Canastra kinsa lakip si Canastra ang gihagisan sa suspetsado.

Ang mga tanod sa nahisgutang barangay usa na niini si Saturnino Señaron ang miresponde sa maong alarma ug miuwang sa suspetsado apan gipaak na hinoon si Señaron sa walang kamot niini.

Pag-abot ni Dumael diha sa police station tungod kay gidala kini sa mga tanod padayon gihapon kining nagsige og yaw-yaw ug namasangil nga gibunlot siya sa mga tanod.

Si PO1 Jundave David sa Talisay City police station ang mialam-alam kang Dumael aron kini mokalma ug mokuyog ngadto sa detention cell.