Pletihan sa traysikol sa Talisay P7 na

Giaprubahan kagahapon sa buntag sa konseho sa dakbayan sa Talisay ang pag-amendar sa Ordinance No. 2008-06 nga nag-regulate sa usbaw sa pletihan sa mga traysikol sa dakbayan ug nahimo na kining P7.

Ang maong ordinansa ang gipangamahan ni Konsehal Edward Alesna, Chairman sa Committee on Laws diin gikan sa P6 nga minimum nga pletihan sulod sa upat ka kilometro giusbawan na  kini og P2.

Ang P8 nga minimum sa pletihan sa traysikol kolektahon sulod sa upat ka kilometro ug laing P1.00 nga dugang sa mosunod nga kilometro.

Apan ang maong ordinansa ang gi-veto ni Mayor Socrates Fernandez tungod sa kadaghang mireklamo kay gibug-atan sa P8 nga minimum nga pletihan.

Si Alesna sa pagkighinabi sa mga tigbalita kagahapon nagkanayon nga imbes P8 ang minimum nga pletihan sa upat ka kilometro giusab kini nila ngadto sa P7 matag tulo ka kilometro ug dugang P1 sa mosunod nga kilometro.

Ang konsehal nagkanayon nga ang Committee on Laws ug Transportation mopagawas og taripa aron mapirmahan sa mayor ug mapatuman na ang bag-ong pletihan.

Ubos sa maong taripa ni Alesna pa, iklaro ang mga lugar sa siyudad nga biyahian sa mga traysikol nga P7 lang ang plete ug gidili ang double charging tungod kay adunay mga drayber sa traysikol nga mangayo og dobleng plete ilabi na diha gikan sa San Isidro paingon sa city hall, Poblacion paingon sa city hall ug gikan sa city hall paingon sa Gaisano Fiesta Mall.