Bombero i-deputized sa LTO gihangop

Pabor si Cebu City Fire Marshall Supt. Ismael Codilla nga himoong deputized agents ang mga bombero sa Land Transportation Office (LTO).

Sa ingon niana nga paagi niingon si Codilla makatabang ang mga bombero pagdakop sa badlungong mga motorista.

Apan gitataw hinoon ni Codilla nga dili pugson ang tanang bombero nga himoong deputized agents sa LTO.

“Okay ra na uy, wala nay problema makatabang pa hinoon ang mga bombero pero dili lang sab siguro ang tanan, sa gusto lang,” sumala ni Codilla.

Ang Bureau of Fire Protection kon BFP maoy nihangyo sa LTO alang sa deputization sa mga bombero aron kini maka-issue og traffic violation receipts.

Kini sa higayon nga dunay masakpang mga motorista nga nakahimo og kalapasan sa traffic rules and regulation ilabi na atol sa ilang pagtubag og alarma sa sunog.

Una nang gipadayag ni BFP Chief Director Enrique Linsangan nga dugay nang nahimong problema sa mga bombero ang badlongong mga drayber.

Partikular na niini kung dunay respondehang alarma ang mga bombero tungod kay dunay mga higayon nga may magpaugat nga drayber ug di mohatag og lugar.

Gihulagway ni Linsangan nga nakapasamot sa kalangay sa mga bombero ang maong mga drayber ug nakaingon usab nga mareklamo ang mga bomberong maoy langayan.

Gipadayag hinoon ni Codilla nga wala masinati sa kabomberohan sa dakbayan ang maong problema tungod kay mokooperar ang mga motorista sa siyudad.

Ang paghimong deputized agents sa mga bombero sa LTO una hinoong ipatuman didto sa kauluhan kung maaprubahan na ang hangyo ni Linsangan.

Nasayran nga duna nay mga bombero kaniadto nga nahimong deputized agents sa LTO apan ang deputization nahunong ra usab sa wala matino nga hinungdan.