Gipasidan-an na ni Mayor Tomas Osmeña ang Cebu City Bantay Dagat Commission (CCBDC) sa dili pagbaligya sa mga butang nga ubos sa kustodiya niini.
Kini human maabot sa kasayuran sa mayor nga dunay pipila ka mga makinang nasakmit sa CCBDC ang gipamaligya nga walay pagtugot sa General Services Office (GSO).
Partikular na niini ang giingong duha ka makina nga nahanaw na diha sa maong buhatan tungod kay giingong gipamaligya kini sumala pa sa mga sakop mismo ni CCBDC project director nga si Cesar Enriquez nga nitug-an sa Banat News.
Gisuwayan nga makuhaan og habig sa Banat News si Enriquez sa duha niini ka telepono ug sa ilang buhatan apan walay motubag niini.
Matud ni Osmeña nga sa iyang gimando nga imbentaryo, walay nangawagtang nga mga butang sa CCBDC gawas lang sa pipila ka pisa nga gipamaligya.
Tungod niini, iya nang gipasidan-an ang labaw niini nga si Enriquez sa dili na pag-usab og baligya sa mga butang nga anaa sa ilang kustodiya.
“I said you have to stop that! I don’t consider it as a serious thing as long as they stop it,” sumala pa sa mayor.
Wala hinuon isipa sa mayor nga pagpangawat gihapon ang gihimo sa CCBDC tungod kay ang halin giingong gigamit ra usab alang sa ilang operasyon.
“Stealing for your own means that’s a serious offense, how can you fault somebody for being resourceful? I’d rather have people who are resourceful rather than people who don’t even like to think, just wait for instructions or whatever,” pagpanalipod pang Osmeña ngadto sa mga sakop sa CCBDC.
Una nang gibutyag sa labaw sa GSO, Ester Cubero, nga illegal ang gihimong pagbaligya sa CCBDC sa pipila ka butang nga ubos sa kostudiya niini.
Kini tungod kay giingong dunay tukmang proseso ang kagamhanan sa dakbayan pagbaligya sa mga butang nga dili na magamit