Girakrakan ang 55-anyos tipi

Patay nang nakit-an niadtong Domingo sa buntag ang usa ka mag-uuma nga natusaktusak ang kalawasan agi sa gituuhang .30 caliber nga bala sa Carbine rifle samtang kini natulog sa payag sa bukirang bahin sa sitio Cantipuhan, barangay Lamisa lungsod sa Balamban niadtong Sabado sa alas 10:00 sa gabii.

Ang biktima mao si Francisco Obradas, 55, molupyo sa nahisgutang lugar samtang wala pa mailhi kung si kinsa ang nihimo niini ngadto kaniya.

Subay sa gihimong pagsukit sukit sa kapulisan sa anak sa biktima nga si Danilo Obradas, 28, molupyo gihapon sa maong lugar nakadungog siya og tulo ka sipang buto nianang pagkagabii sa Sabado nga naggikan sa pikas walog diin matulog nga nag-inusara ang iyang amahan.

Apan tungod sa iyang kahadlok wala siya mogawas sa ilang balay ug nianang pagkabuntag niya kini gisusi ug iyaha nalang nakit-an nga nagbuy-od na sulod sa payag ang biktima nga nagkadugo.

Dali nila kining gipahibawo sa kapulisan apan sa paghiling ni municipal health officer nga si Dr. Aurora Bendivil patay na kini ug dunay tulo ka samad pinusilan ang biktima diha sa tuong bahin sa lawas nilapos sa pikas, laing samad diha sa dughan ug walang bahin sa paa ug tuhod.

Matod ni PO1 Alby Agua sa Balamban Police dihang nahinabi sa Banat News tulo ka kabhang sa bala sa .30 caliber nga gituuhang gikan sa carbine rifle gibana-banang duha ka metros gikan sa payag ang nakit-an sa dapit.