‘OG’ gang nadakpan

Gibalhog na kagahapong adlawa sa Cebu City Jail ang usa ka lider sa “Crips” kinsa nadakpan niadtong Sabado gumikan sa kasong attempted homicide nga nahimo niadtong niagi pang tuig.

Ang gibalhog giila nga si Ariel Cabalda 18, “alyas Isyot” nga gihulagway sa kapolisan nga ‘Original Gang’(OG) sa maong grupo ug taga Kalubihan Banawa, barangay Guadalupe.

Si Cabalda nasikop nila ni SPO1 Jeffrey Diola ug mga kaubanan sa Theft and Robbery Section sa Cebu City Police Office pinasikad sa Warrant of Arrest nga giisyu ni Judge Rafael Yrastorza sa Regional Trial Court branch 14.

Mokabat sa P50 mil ang piyansa nga gi-rekomendar sa korte alang sa temporaryong kagawasan niini.

Ang hepe sa TRS Sr. Insp. Michael Anthony Bastes nitug-an sa Banat News nga si Cabalda maoy kauban ni Joson Flores alyas Iro kinsa lider usab sa maong gang diha sa B. Rodriguez ning dakbayan.

Si Flores nadakpan na usab niadtong milabay’ng semana ug gibalhog sa Cebu City Jail.

Matud pa ni Bastes nga si Cabalda usa sad sa gitumbok nga kauban sa mga batan-ong tulisan nga nitulis sa usa ka Spa ug Internet Café diha sa Osmeña Blvd. niadtong niaging bulan.