Bagolbagol paksit

Napaksit ang walang bahin sa tampihak nga bagolbagol sa usa ka 38 anyos nga lalake human kini tigbasa sa iyang amigo didto sa bukirang bahin sa Sitio Duyan-duyan, barangay Cabutongan lungsod sa Santander, Cebu niadtong Domingo sa alas 7:30 sa gabii.

Ang biktima mao si Jesus Rusiana Jr., 38,  minyo, usa ka mag-uuma ug molupyo sa nahisgutang lugar samtang ang suspek mao ra usab ang iyang barkada ug kauban sa inom nga si Sandy Sadeo, 29, minyo, ug silingan ra sa biktima.

Matud ni PO1 Leonixto Solon sa Santander Police Station nga nahinabi sa Banat News nga samtang nag-inom ang biktima ug ang suspetsado kauban sa ilang ubang mga barkada, nagkalalis kini nga misangpot sa kainit.

Kini sa dihang giugkat nila ang  milabay na nilang panagbingkil nga maoy nakapadako sa ilang away.

Apan matud pa nahubsan sa katarungan ug naupsan sa pailob ang suspetsado ug mibiya kini sa ilang giinoman, apan sa iyang pagbalik sundang na ang gidala ug diretsong gihabas ang biktima sa iyang hinagiban.

Ang biktima nga wala kapanagang gumikan kay wala makabantay, nakalihay og dyutay hinungdan nga natapsingan sa hait kaayong suwab sa sundang ang iyang tampihak, matud pa ni PO1 Solon.

Ang ilaha nang mga kauban sa inoman maoy mitabang sa biktima ug mihatod niini ngadto sa Oslob District Hospital apan gipabalhin kini ngadto sa  South General Hospital sa siyudad sa Naga.

Samtang ang suspetsado nadakpan usab  sa miresponde nga mga polis ug nasakmit usab ang iyang sundang nga dunay 16 pulgada nga gitas-on nga maoy iyang gigamit pagpanigbas.

Nagtingkagol na karon sa prisohan   sa Santander ang suspetsado samtang nagpaabot sa tukmang kaso nga ipasaka batok niya.