Di pa hingpit maisip nga kinarnap ang 6 sakyanan sa M’daue

Dili pa makunsiderar sa Highway Patrol Group-7 nga mga kinarnap nga mga sakyanan ang unom ka mga sakyanang gisakmit sa Mandaue City Police Office ug gi-turn over diha sa ilang buhatan.

Kini hangtud wala pa mogawas ang resulta sa macro-etching sa mga chassis ug engine serial numbers sa matag usa ka sakyanan nga gikan sa PNP Crime Laboratory-7.

Si Sr. Supt. Jesus Manubay, regional officer sa HPG-7 sa pakighinabi sa mga tigbalita kagahapon nagkanayon nga kung mapamatud-ang gipang-tamper ug gipang-ilisan na ang mga serial numbers niini ug masuta sa Vehicle Identification Management System diha pa sila magdudang kinawat gyud kini.

Sa pagkakaron wala pay bisan usa ka tawong midangop sa ilang buhatan aron pag-angkong ilaha kini ug gikarnap.

Niadtong milabay’ng semana, dunay grupo sa Quezon City Police Department ang nironda sa usa ka panimalay ug garahian diha sa barangay Tisa ug gisakmit ang 13 ka mga sakyanan nga giingong mga kinarnap gikan sa Luzon.

Ang maong mga polis armado og search warrant gikan sa korte sa ilang lugar ug nakigtambayayong sa mga sakop sa Regional Investigation Division pag-serve niini ngadto sa panimalay ni Joseph Cañete human kini gikatahong naaktuhang nagmaneho og usa ka kinarnap nga Starex Van nga miresulta usab sa pagkasakmit sa lain pang 12 ka sakyanan.

Gipangita usab sa kapolisan ang bayaw ni Cañete nga maoy business partner niini nga si Reynold dela Torre. Si dela Torre daan nang mihimakak sa mga pasangil batok kaniya ug sa iyang bayaw ug nagkanayon nga limpyo ang ilang negosyo.

Si Manubay sa iyang bahin miangkong wala pa siya’y ideya sa background ni dela Torre ug ni Cañete sanglit bag-o pa siyang nahimong pangulo sa HPG-7 apan nasayod siyang napasakaan na nila og kaso si dela Torre og kasong anti-fencing law duha ka higayon ning tuiga.

Matud pa sa opisyal nga kung mapamatud-an hinuon nga kinawat ang maong mga sakyanan ilahang pasakaan og kasong anti-fencing o ba kaha carnapping ang mga responsable.

Wala usab ikasakit sa opisyal ang gihimo sa QCPD sa pagronda dinhi sa ilang teritoryo nga walay koordinasyon kanila sanglit paigo na kaniyang nipahibalo ang maong grupo sa Police Regional Office-7 sa ilang misyon.

Nisabot usab siyang tungod kay ang source sa impormasyon sa mga polis gikan sa kaulohan ug gipasuputan pa kini og search warrant.