Mahimo nang makabalik sa ilang naandang rota ang mga jeep de pasaheroan nga magbiyahian og Talamban ug Lahug nga dunay 13C ug 04L nga rota.
Kini tungod kay napupos na ang usa ka buwan nga experimental rerouting nga gipatuman sa Cebu City Traffic Operations and Management (Citom).
Matud sa executive director sa Citom, Arnel Tancinco wala silay giluwatang kamanduan ngadto sa mga traffic enforcer nga panakpon ang mga PUJ nga mobalik sa karaan nilang rota.
“Officially, human na ang experimental rerouting, so, kung mobalik sila sa ilang karaang rota, naa ra nila, wala man mi momando sa mga enforcer nga panakpon sila,” sumala ni Tancinco.
Wala pa hinuon matino kung permanente na ang gipatuman nga experimental rerouting karong nahuman na ang ilang pagtuon niini.
Nagkanayon si Tancinco nga iyang isumitir ang resulta atol sa Citom board meeting ugmang adlawa, apan wala pa hinoon matino kung dunay board meeting ang Citom ugmang adlawa tungod kay holiday ang lalawigan nunot sa ika-439 ka founding anniversary sa lalawigan.
Apan sa pasiunang kasayuran sa Banat News nasayran nga 12 porsyento lang ang traffic reduction dihang gipatuman ang experimental rerouting.
Gani kini gihulagway sa chairman sa Committee on Transportation sa City Council ug sakop sa Citom Board, Konsehal Jack Jakosalem nga wala kini dakong epekto.
Ang konsehal pabor nga ibalik sa karaang agianan ang 13C ug 04L nga rota tungod usab sa reklamo gikan sa mga pasahero, mipadayag nang daan si Jakosalem nga supakon niini kung himuong permanente ang rerouting.