Danao City milapas sa balaud sa COA

Ang Commission on Audit (COA) sa dakbayan sa Danao adunay nakitang kalapasan bahin sa pag-implementar sa proyekto kansang pundo  gikuha gikan sa 20 porsiyentong development fund sa siyudad.

Base sa taho sa mga state auditors nga ang lote nga nagkantidad og P14,941,590 wala pa mabalhin ang titulo niini ngadto sa ngalan sa dakbayan ug usa kini ka tataw nga  kalapasan  sa Section 148 sa COA Circular No. 92-386. Ang Section 148 sa maong COA Circular nagkanayon nga ang matag mayor sa lungsod o siyudad, maoy responsable sa maayong paggamit ug pagdumala sa mga yuta kansang titulo iyaha sa lokal nga kagamhanan.

Ang nahisgutang circular nagpasabot nga kinahanglang siguradohon sa usa ka mayor o tagdumala nga ang tanang lote nga ubos sa iyang responsibilidad  marehistro kini ubos sa Torrens Title System ug mabantayan kini nga walay mga eskuwater ug uban pang mga tawo nga moukopar niini ug ang pagsupak niini usa ka dakong kalapasan sa balaod sa COA.