Ang mga officers sa 1st Cebu Ready Reserve Batallion nahimo na karong kabahin sa 439th Founding Anniversary sa lalawigan sa Sugbu nga magsugod sa mga kalihokan karong adlawa.
Ang ilang presentation nga pagahimoon pangunahan ni Gobernador Gwendolyn Garcia kinsa opisyal nagdala sa iyang ranggo isip Lt. Colonel sa Army Reserve Command.
Si Major Soliver Peras nga maoy batallion commander sa 1st CRRBn sa Sugbo maoy mangulo sa pass-in-review uban sa gobernador sa dili pa pagahimoon ang flag raising ceremony.
Ang pagbaton og bahin sa mga sakop ug opisyal sa 1st CRRBn maoy pag-ila sa kagamhanan sa lalawigan sa mga reservist sa army reserve command sa Sugbu ilabi na nga ang gobernador usa usab sa mga labaw’ng opisyal niini.
Human sa flag raising ceremony nga pagatambongan sa tanang kawani ug mga mayor sa kalungsoran ug siyudad sa lalawigan, maoy pagahimoon ang pagpakayab sa mga bandila sa kalungsoran ug mga dakbayan niining lalawigan.
Kini pagasundan usab sa pagtukas sa historical marker ug pagpaila sa edipisyo sa National Historical Institute isip national land mark sa Sugbu.
Dugang kalihokan sa pagbukas sa usa ka semanang pagsaulog sa 439th Founding Anniversary mao ang pagbukas usab sa Dayon -Dayon contest, photo exhibits, volleyball dayon-dayon contest, garbo fashion show, agri-fair, puso making contest ug ang awarding ceremony sa mga mananaog nga Sugboanon sa nagkalainlaing bangga.