Patay diha-diha gilayon ang usa ka kargador sa Carbon Public Market human gibuk-an og ulo mga alas 10:30 niadtong Sabado sa gabii samtang natulog kini diha duol sa railings sa Gate 1 sa South Road Property sa sitio Lutaw-Lutaw dalan D. Jakosalem St., sa barangay Sto. Niño ning dakbayan.
Ang namatay giila sa kapulisan nga usa ka Loloy Oliva 35, minyo ug kasamtangang nagpuyo sa nahisgutang lugar apan lumad nga taga Ubay Bohol.
Ang biktimang si Oliva nakaangkon og samad pinusilan sa iyang ulo gikan sa wala matinong kalibre sa armas dihang gipusil makaduha kahigayon sa duha ka wala mailhing mamumuno.
Base sa imbestigasyon nila ni SPO1 Rogelio Nedamo sa Homicide Section sa Cebu City Police Office ang biktima sa sayo pa nakit-ang hubog ug namuak og botelya sa maong lugar.
Gikatahong nanghagis kini ug gihagad og sumbagay ang mga lumalabay ug mga tawo sa palibot, apan samtang kini natulog na sa iyang folding bed diha sa maong lugar dunay duha ka wala mailhing tawo ang miduol sa iyang gihimutangan ug kalit siyang gipusil makaduha ka higayon tumong sa ulo.
Human sa pagpamusil ang duha ka mga mamumuno yano lang usab kaayong naglakaw paingon na sa dalan sa MC. Briones og wa na maabti pa sa mga nirespondeng police.