‘Male prosti’ sikop sa Colon ug Magallanes
Dili lang karon mga babaye ang nalambigit sa prostitusyon, kini human makadawat og mga reklamo ang kapolisan kabahin sa mga lalaking naghimo usab niini diha sa downtown area ning dakbayan.
Nunot niini, ang Criminal Investigation and Intelligence Branch sa Cebu City Police Office pinanguluhan ni Sr. Insp. George Ylanan ug Insp. Aileen Recla misikop sa mga gidudahang nalambigit niini kagahapon sa kaadlawon diha sa dalan
Wala hinuoy naaktuhang nihimo niini sa mga nadakpan apan gumikan kay wala silay napakitang hustong katarungan sa ilang presensya diha sa maong lugar hinungdan nga sila gibagransya.
Sa 21 ka mga dinakpan, 13 niini mga kalalakin-ang gidudahang nalambigit sa prostitusyon, pipila kanila mga tinuod nga mga lalaking gitawag nga “nilatch” ug ang kadaghanan pulos mga bayot nga mga nag-edad gikan sa 19 anyos ngadto sa 49.
Samtang walo usab ka mga babayeng nag-edad og 20 anyos ngadto sa 33 anyos nga gidudahang susama gihapon og gipangbuhat ang gidakop usab sa mga polis.
“This in connection adtong panawagan ni Bullecer kabahin anang mga nagkadaghang male prostitutes dinhi,” asoy pang Ylanan.
Dili palang dugay, si Rene Josef Bullecer ang chairman sa Cebu Anti-Indecency Board (Caib) ug pangulo sa Aids-Free Philippines mialarma sa kapolisan ug sa mga hingtungdang ahensya sa gobiyerno kabahin niining maong problema.
Gikabalak-an sa maong pundok ang pagkatap unya sa makatakod nga sakit nga makuha pinaagi sa dili luwas nga pakighilawas.
Sa linaing operasyon niadtong Biyernes sa gabii, nasakmit sa CIIB ang walo ka mga video karera ug moli-moli nga may mga logo nga TM ug Dragon diha sa sudlonong bahin sa barangay Carreta.
Nadakpan usab sa grupo ni SPO1 Alfredo Petallar ang usa ka lalaking naghupot og duha ka paketeng gidudahang shabu diha sa sitio Plastikan sa barangay Duljo-Fatima atol sa ilang operasyon batok sa illegal gambling niadtong milabay’ng Biyernes sa hapon .
- Latest
- Trending
