Lalaki misuway og gulgol sa liog sud sa tambalanan sa VSMMC

Usa ka 33-anyos nga lalaki nga naguol tungod sa iyang kahimtang ang nipangka sa iyang ulo sa bildong pultahan sa Vicente Sotto Memorial Medical Center ug nigamit sa buak nga bildo niini  gigulgol ang iyang ubol-ubol kagahapon sa kaadlawon.

Ang nagsuway sa pagpakamatay giila sa kapulisan nga si Erick Sarmiento taga sitio Sto. Niño barangay Don    Andres Soriano, dakbayan sa Toledo.

Nagkaguliyang ang mga tawo sa Information Section dihang ni-responde ang kapulisan sa Fuente Police Station nga maoy nidala ni Sarmiento sa Emergency Room sa nahisgutang tambalanan.

Nasayran, si Sarmiento unang nisuway sa pagkutlo sa iyang kinabuhi sulod sa ilang panimalay niadtong Biyernes sa alas 9:00 sa gabii.

Base sa report sa kapulisan sa dakbayan sa Toledo, si Sarmiento gituuhang nalisuan sa iyang pangisip human mamatay ang iyang amahan niadtong Hulyo 22 ning tuiga.

Gikatahong gi-abandonar usab si Sarmiento sa iyang inahan ug gani gikatahong gibun-og pa gyud kini sa iyang igsuong lalaki gumikan usab sa ilang wala magkasinabtanay.

Si PO1 Celso Makidato ug PO1 Aldwin Pepito sa Toledo Police Station nagkanayon nga nisuway og pakamatay si Sarmiento  niadtong milabay’ng Biyernes pinaagi sa paghiwa sa iyang liog.

Apan dali kining natabang ug nadala sa tambalanan tungod sa kapin tulo ka pulgadang lawom nga samad sa liog. Gikatahong nangangkon si Sarmiento nga dunay tawong gustong mopatay kaniya maong buot nalang siyang maghikog.

Apan human ibalhin gikan sa Toledo Hospital ngadto na sa VSMMC kagahapon kalit kining nag-wild og gisungag ang bildo sa pultahan sa Information Center ug nahitabo na ang ikaduhang pagsuway niini og pagpakamatay.